Die onafhanklike verkiesingskommissie het nie die moontlikheid van die hertel van stemme uitgeskakel nie, nadat hulle klagtes van verskeie politieke partye ontvang het.
Die uMkhonto weSiswe (MK)-party het gevra die nasionale verkiesing se stemme moet weer getel word. Hulle het ook aangedui dat hulle teen die resultate gaan appelleer.
Volgens Nhlamulo Ndhela, die party se woordvoerder, het hulle glo ongerymdhede op stemvorms gevindl. Hulle beweer die verkiesingskommissie wil nie sê watter mense Vrydagoggend vroeg by die Telkom-stelsels rondgedwaal het nie.
Die onderbreking in die sisteem, wat twee uur geduur het, is ook vir hulle kommerwekkend.
Hulle is nie al party wat ontevrede is nie. Die leier van die African Congress for Transformation (ACT), Ace Magashule, beweer ook dat stemme moontlik aangepas is. ’n Klag is amptelik deur die party by die verkiesingskommissie ingedien omdat hulle glo daar is met sekere stembokse gepeuter.
Die Vryheidsfront Plus het aangedui hulle aantal stemme stem nie ooreen met wat die verkiesingskommissie gekry het nie.
Die finale uitslae word Sondagaand om 18:00 bekendgemaak.
Bronne: SABC, EWN, X, TikTok
