LIMPOPO. – Minstens drie mense, onder wie twee leerlinge, is volgens voorlopige inligting dood, nadat ’n Quantum-minibus en ’n bus gebots het. Albei die voertuie het leerlinge vervoer op die pad tussen Jupiter en Diana in die Mashashane-gebied.
Polokwane-munisipaliteit sê sy brand-en-reddingsdienste is na die toneel ontbied, waar nooddienspersoneel werk om leerlinge wat in die voertuie vasgekeer is, te bevry. Meganiese reddingskake word gebruik om die vasgekeerde leerlinge uit die voertuie te haal. Volgens voorlopige inligting dui daarop dat die bestuurder van een van die voertuie en twee leerlinge in die botsing dood is. Die reddingsoperasie is steeds aan die gang en verdere besonderhede oor die ongeluk en moontlike ander slagoffers is nog nie bekend nie.
Motoriste word gemaan om uiters versigtig in die gebied te bestuur en die toneel, waar moontlik, te vermy sodat nooddienspersoneel onbelemmerde toegang het.
