GAUTENG – Die Gautengse departement van onderwys (GDE) het bevestig twee leerlinge van afsonderlike skole het gesterf ná gebeure by die betrokke skoolpersele.
Steve Mabona, GDE-woordvoerder, sê ‘n gr. R-leerling van Laerskool Bennet Isaacs in Coronationville, Johannesburg, is oorlede nadat hy glo beserings op die skoolterrein opgedoen het.
In ’n aparte voorval het ’n gr. 12-leerling van Vosloorus Comprehensive Hoërskool op 4 Februarie tydens ‘n middagstudiesessie siek geword en is later oorlede terwyl sy van ‘n mediese fasiliteit na ’n hospitaal vervoer is. Die skool is op 5 Februarie van die matrikulant se afsterwe ingelig. Die departement het ondersoeke ingestel en sal die bevindinge aan die publiek bekend maak sodra die prosesse afgehandel is.
Ouers, skole en gemeenskappe word versoek om ondersteuning te bied aan die families en leerlinge wat deur hierdie gebeure geraak is.
