LIMPOPO. – Sers. Nditsheni Lefty Mphephu (46) is lewenslange tronkstraf opgelê vir die doodskiet van Teith Muthige ná ’n rusie oor harde musiek laataand toe studente besig was om te studeer.
Phaladi Shuping, Opod-woordvoeder, sê die voorval het op 20 November 2023 omstreeks 22:00 in Makwarela, Thohoyandou plaasgevind. Die beampte het volgens getuienis harde musiek gespeel terwyl hy sy motor gewas het. In die huis op dieselfde erf was studente besig om vir hul eindeksamen te leer. Die oorledene het die beampte gekonfronteer oor die geraas omdat dit die leeromgewing versteur het. Die situasie het in ’n argument ontaard waarna die beampte glo sy vuurwapen gaan haal en die jong man verskeie kere geskiet het.
Hy het ná die skietvoorval van die toneel gevlug, maar is die volgende dag in hegtenis geneem. Die slagoffer het later aan sy beserings beswyk.
Die hof het die beampte ook ongeskik verklaar om ’n vuurwapen te besit.
