GAUTENG. – Michael Harry Lomas se aansoek om borg in ‘n Eskom-korrupsiesaak sal vandag weer in die Johannesburg-hooggeregshof aangehoor word. Die staat beplan om die aansoek teen te staan.
Henry Mamothame, woordvoerder vir die NVG, sê die Ondersoekdirektoraat teen Korrupsie (Idac) se regsverteenwoordiger het dit op rekord geplaas dat die borgaansoek geopponeer sal word en ‘n verklaring met die redes daarvoor sal voorsien word.
Lomas is in September 2024 van die Verenigde Koninkryk uitgelewer, waarna hy in die Kempton Park-landdroshof verskyn het. Die saak is daarna na die Palm Ridge- gespesialiseerde kommersiële misdaadhof oorgeplaas en daarna na die hooggeregshof.
Nog 11 verdagtes verskyn saam met Lomas op 41 aanklagte van korrupsie, ter waarde van R1.4 biljoen, in die hof. Die geld was bedoel vir ‘n opgradering van die Kusile-kragstasie in Mpumalanga in 2014 en 2017.
Die saak is tot 5 Maart vir voorverhoor uitgestel.
