KWAZULU-NATAL. – Twee lyfwagte, ’n mediese dokter, ’n prokureur, ‘n streekbestuurder van ‘n groot winkelgroep, en ‘n boer is tydens die uitvoering van operasie NenzaniLaEzweni deur die padverkeersinspektoraat in Park Rynie in hegtenis geneem.
Volgens Siboniso Duma, die LUR vir vervoer en behuising, is twee lyfwagte van die Ray Nkonyeni- plaaslike munisipaliteit in hegtenis geneem, toe hulle alleen in ’n amptelike BMW X5 gereis het, terwyl die adjunkburgemeester in ’n raadsvergadering was. Die twee word van roekelose bestuur, die onwettige gebruik van blou ligte, die nabootsing van ’n polisiebeampte, asook die besit van ’n vuurwapen sonder ’n vuurwapenlisensie aangekla. Die blou ligte is gekonfiskeer en as bewysstuk by die polisie geregistreer. Daar is ook op die voertuig beslag gelê. Duma sê hy verwelkom die samewerking van die munisipale bestuurder, wat aangedui het dat die wet toegepas moet word.
’n Mediese dokter wat in ‘n Ford Ranger Raptor teen 181 km/h gery het, ‘n prokureur wat in ‘n VW Golf teen 175 km/h en ‘n winkelstreekbestuurder wat in ‘n Toyota Corolla Cross teen 170 km/h gery het, is ook in hegtenis geneem. ‘n Boer wat 199 km/h in ‘n 120 km/h-sone gery het, is kort gelede in hegtenis geneem.
Duma waarsku dat die operasie voortgesit sal word namate die feestyd naderkom. “Ons is besig om ons padnetwerke op te ruim, wet en orde te herstel en die veiligheid van padgebruikers te verseker soos wat deur die Nasionale Padverkeerswet bepaal word,” het hy gesê.
Die verklaring beklemtoon dat die RTI geen toegewings sal maak tydens voortgesette operasies nie.
