LIMPOPO. – ‘n Man is Maandagaand, omstreeks 22:20 tydens ‘n spiking-insident op die N1, Radium, in Bela Bela (Warmbad) doodgeskiet.
Kol. Malesela Ledwaba sê ‘n Toyota Quantum met ‘n bestuurder en passasiers het net na Mantsole deur spikes gery. Die bestuurder het gestop en ondersoek ingestel. Passasiers het gesoek vir iets om die sleepwa op te lig, sodat ‘n band geruil kon word. Twee persone is in die gras opgemerk. Hulle het die bestuurder glo met ‘n vuurwapen gedreig, waarna hy probeer wegkom het om die passasiers te waarsku. Hy het egter geval. Die bestuurder se broer, wat ‘n passasier was, het na bewering na die pad geloop en is deur die verdagtes in die rug geskiet.
Ledwaba sê die ander passasiers is deursoek en van ‘n onbekende bedrag geld en selfone beroof, waarna die verdagtes gevlug het. Nooddienste het die broer van die bestuurder op die toneel dood verklaar.
Die polisie is ontbied en sake van moord en gewapende roof is geregistreer. Die polisie is op soek na die verdagtes en vra enigiemand met inligting om sers. Moeng Frank by 082 780 7265 te bel.
Hou die volgende veiligheidswenke van Live Traffic and Road Incidents in gedagte wanneer jy ‘n slagoffer van spiking is:
- Indien jy ‘n slagoffer van spiking met jou voertuig is, MOET OM GEEN REDE OP ‘N HOOFWEG STOP nie. Ry stadig na ‘n veilige plek, soos ‘n nabygeleë vulstasie of ‘n goedverligte area met veiligheidskameras.
- Sorg dat jy altyd genoeg brandstof het vir jou reis sodat jy nie sonder brandstof gaan staan nie.
- Sorg dat jy altyd ‘n ekstra band het en maak seker daar skort niks met jou voertuig nie.
- Gee vir vriende en familie jou live location sodat hulle kan weet waar jy is.
- Kontak die owerhede onmiddellik as jy ‘n slagoffer van spiking is en meld die insident aan. Deel jou live location op die groep.
- Stuur ‘n kort beskrywing van die situasie na die groep.
- Moenie snags ry as jy dit kan verhoed nie. Verminder spoed sodat jy in beheer kan wees.
- Moenie drink en bestuur nie. Met ‘n helder verstand kan jy vinnige besluite maak wat jou lewe kan red.
- Deel hierdie skakel met jou geliefdes en bevorder waaksaamheid en veiligheid.
Onthou jou veiligheid is ons topprioriteit. Kom ons werk saam om veilig op ons paaie te wees!
Volg die volgende skakel na die Live Traffic and Road Incidents WhatsApp-kanaal.
