WES-KAAP. – Xzeaan Fortuin is skuldig bevind en gevonnis vir dieremishandeling nadat ’n hond in Mei 2024 van die vierde verdieping van ’n woonstelgebou in Belmont Park gegooi is. Die vonnis is vir vyf jaar heeltemal opgeskort.
Die Kaap die Goeie Hoop-DBV sê die saak het begin nadat wetstoepassingsbeamptes van die Stad Kaapstad op die toneel opgedaag en die DBV onmiddellik in kennis gestel het. DBV-inspekteurs het die hond in ’n uiters benarde toestand aangetref. Die dier kon nie op sy eie staan of beweeg nie, het bloed aan sy lyf gehad, swaar asemgehaal en was klaarblyklik in erge pyn. Die hond het ook gekerm wanneer hy aangeraak is en is dringend vir veeartsenykundige behandeling geneem. ’n Saak van dieremishandeling is geopen en die voorval is in samewerking met die polisie ondersoek.
Ná talle hofverskynings oor meer as twee jaar is die saak op 24 Julie afgehandel toe Fortuin skuldig bevind is. Die hof het hom tot ’n boete van R10 000 of ses maande gevangenisstraf gevonnis wat vir vyf jaar in geheel ogpeskort is. Fortuin is ook vir twee jaar onbevoeg verklaar om enige dier te besit of daarvoor verantwoordelik te wees.
Druk hier om meer te lees.
