KWAZULU-NATAL. – ’n Man in sy 30’s is net ná 01:00 vanoggend (Sondag) ernstig beseer toe hy deur vyf honde in sy tuin in Wrenway-weg, Yellow Wood Park, suid van Durban, aangeval is.
Luidens ‘n verklaring van Garrith Jamieson van ALS Paramedics het paramedici op die toneel gevind dat die man veelvuldige bytplekke oor sy hele liggaam opgedoen het en in ’n kritieke toestand was. “Gevorderde lewensondersteuningsparamedici het hom op die toneel gestabiliseer voordat hy dringend na ’n nabygeleë hospitaal vervoer is vir verdere behandeling,” het Jamieson gesê.
Die man woon op die betrokke perseel en die omstandighede wat tot die aanval gelei het, is in hierdie stadium onbekend. Die polisie was op die toneel en sal die voorval verder ondersoek.
