GAUTENG. – ‘n Man (38) het vanoggend (Woensdag) omstreeks 06:30 by die Areyeng-bushalte in Paul Krugerstraat glo uit sy voertuig geklim en op ‘n man (28) en ‘n vrou (26) in ‘n voertuig geskiet. Hy het glo daarna homself doodgeskiet. Die man wat geskiet is, is na ‘n hospitaal vervoer, terwyl die vrou dood verklaar is.
Kapt. Johan van Dyk, Tshwane-polisiewoordvoerder, sê aan Nuusflits volgens beskikbare inligting het die skieter noordwaarts in ’n wit Kia gery toe hy stop, uitklim en met ’n vuurwapen na ’n wit Nissan Almera geloop het waarin die slagoffers gesit het. Hy het glo verskeie skote op die voertuig se twee insittendes geskiet. Die Nissan het daarna nog sowat 150 meter voortbeweeg voordat dit tot stilstand gekom het.
Die skieter het daarna na bewering die vuurwapen op homself gerig en selfdood gepleeg. Nooddienste het die vroulike passasier in die Nissan dood verklaar. Die bestuurder is op die toneel gestabiliseer en in ’n kritieke toestand na Kalafong-hospitaal geneem.
Lede van misdaadtoneelbestuur het die toneel vir bewysmateriaal gefynkam. Die vuurwapen wat gebruik is, is op die toneel herwin en sal vir forensiese ontleding ingedien word. Pretoria-Noord-polisiekantoor ondersoek sake van moord, poging tot moord en ‘n geregtelike doodsondersoek.
