CHICAGO, VSA. – ‘n Man is federaal aangekla nadat hy Maandag ‘n vrou (26) op ‘n trein in Chicago aan die brand gesteek het en “brand t**f!” geskree het.
Lees ook: Vrou dood na sy op trein aan die brand gesteek is
Lawrence Reed (50) is daarvan aangekla dat hy ‘n terreuraanval uitgevoer het of geweld teen ‘n massa-vervoerstelsel gepleeg het.
Volgens federale aanklaers het Reed doelbewus petrol en ‘n aansteker gebruik om ‘n vrou op ‘n CTA Blue Line-trein aan die brand te steek.
Die VSA-distriksprokureur vir die noordelike distrik van Illinois, Andrew Boutros, het gesê die vrou was “besig om op haar foon te lees en niemand te pla nie” in die middel van die treinwa toe Reed van agter na haar geloop, petrol oor haar kop en lyf gegooi en haar aan die brand probeer steek het.
Sy het na die agterkant van die treinwa gevlug, waarna Reed die res van die brandstof in ‘n bottel aan die brand gesteek en dit gebruik het om haar aan die brand te steek.
Boutros het gesê beeldmateriaal het gewys hoe Reed vir die vrou kyk terwyl sy probeer het om die vlamme te blus deur op die grond te rol.
Sy kon uit die trein gehelp word voordat sy ineengestort het. Boutros het gesê “twee Samaritane het toe die brand geblus”. Die vrou is in ‘n kritieke toestand in ‘n hospitaal opgeneem.
Reed het ‘n geskiedenis van geweldaddige misdrywe en verskeie kriminele sake teen hom. Hy het in April 2020 ‘n gebou aan die brand gesteek, vrouens in die gesig geslaan, asook ‘n man in die gesig geslaan op ‘n CTA Blue Line-platform.
Reed het in Augustus glo ‘n vrou aangerand en is vrygelaat ten spyte van aanklaers se versoek om hom in hegtenis te hou.
Bronne: Fox News, Daily Mail, Hindustan Times
