LIMPOPO. – ‘n Man (40) is Donderdag deur die Seshego-streekhof vir die seksuele voorbereiding en verkragting van ‘n seun (12) twee keer lewenslange tronkstraf opgelê.
Kol. Malesela Ledwaba, polisiewoordvoerder, sê in ‘n verklaring die veroordeelde het die minderjarige deur ‘n advertensie vir ‘n fiets op Facebook gelok. Hy het die fiets aan die minderjarige belowe, sy vertroue gewen, seksueel voorberei en twee keer op verskillende tye verkrag.
Die man is op aanklag 1 sowel as aanklag 2 van verkragting elk lewenslank gevonnis en op aanklag 3 en aanklag 4 vir seksuele voorbereiding elk 5 jaar. Die vonnisse word gelyktydig uitgedien.
Sers. Nation Teffo van Seshego-GKS se ondersoekwerk het tot die inhegtenisneming, weiering van borg en aanhouding tot die afhandeling van die verhoor gelei.
