NOORD-KAAP. – Twee mans is Vrydagmiddag in hegtenis geneem nadat dwelms ter waarde van sowat R16,4 miljoen op die N9 naby Colesberg onderskep is.
Volgens polisiewoordvoerder, kol. Cherelle Ehlers, het polisiebeamptes van die Vrystaat en die Pixley ka Seme-distrik ’n verdagte Toyota Fortuner sowat 10 km buite Colesberg in die rigting van Noupoort voorgekeer en deursoek. Tydens die soektog is die Mandrax-tablette ontdek.
’n Vuurwapen, ammunisie en die voertuig is ook gekonfiskeer. Die twee verdagtes is op aanklagte van dwelmhandel in hegtenis geneem.
