WES-KAAP. – Maselsgevalle neem vinnig in stedelike gebiede toe, insluitend Khayelitsha, Mfuleni, Eersterivier, Somerset-Wes, Mitchells Plain, Kraaifontein en Wesbank. Volgens die departement van gesondheid in dié provinsie hou die toename verband met ’n daling in kinderinentings, wat pogings om uitbrake te beheer, bemoeilik.
In ‘n verklaring sê die departement die provinsie het sedert Oktober 2024 sy inentingsprogramme verskerp en werk saam met die nasionale departement van gesondheid en Sahpra om voldoende voorrade maselsentstof te verseker. ’n Vroeë waarskuwing- en reaksiesisteem is ingestel om uitbrekings vinniger op te spoor, terwyl teikengerigte inentingsveldtogte in hoërisikogebiede voortgaan.
Masels is hoogs aansteeklik en simptome sluit ’n hoë koors, uitslag, rooi oë, loopneus en hoes in. Ouers word versoek om kinders met sulke simptome tuis te hou en dadelik mediese hulp te soek as hulle baie koorsig of slaperig raak of sukkel om te eet, aangesien komplikasies ernstig kan wees.
Gratis kinderinentings is beskikbaar by alle staatsklinieke, terwyl gemiste dosisse ingehaal kan word. Privaat fasiliteite bied ook inentings aan. Die departement doen ’n beroep op ouers om hul kinders te laat immuniseer en toestemming te gee wanneer inentingspanne hul skole besoek.
Druk hier om meer te lees.
