LIMA. – Peruaanse owerhede het meer as 3 000 tarantulas op die internasionale lughawe Jorge Chávez in Lima gekonfiskeer voordat dit na Duitsland gesmokkel kon word. Die spinnekoppe is in gebruikte sokkies in drie tasse versteek wat deur twee Duitse burgers en ’n Poolse burger gedra is. Die ongewone vrag is tydens ’n roetine-inspeksie deur doeanebeamptes ontdek.
Cora Suarez, ’n tegnikus van Peru se nasionale bos-en-wildlewedienste (Serfor), het aan Agence France-Presse (AFP) gesê beamptes het beweging in die bagasie opgemerk. Die sokkies het blykbaar begin beweeg toe hulle die tasse ondersoek. Volgens Suarez was daar klein en groot spinnekoppe tussen die versteekte diere.
Die tarantulas het uit verskillende dele van Peru gekom en was in verskillende ontwikkelingstadiums, van eiers en pas uitgebroeide kleintjies tot volwasse spinnekoppe. Suarez sê een tarantula kan in Europa sowat €500 (ongeveer R9 700) haal. Die moontlike waarde van die besending kon dus sowat €1,5 miljoen (ongeveer R29 miljoen) beloop het.
Die drie buitelanders is deur die polisie se eenheid wat omgewingsmisdade ondersoek, in hegtenis geneem en sal deur strafregtelike vervolging in die gesig gestaar word, het Serfor gesê. Onwettige handel in wilde diere is volgens Interpol ’n wêreldwye bedryf wat jaarliks na raming sowat 20 miljard Amerikaanse dollar genereer.
Bronne: AFP, The Guardian, The Witness
