WES-KAAP. – Die polisie het tydens ’n grootskaalse multidissiplinêre operasie by ’n winkelsentrum in Bellville vervalste goedere ter waarde van sowat R10 miljoen in beslag geneem. Meer as 40 winkels is tydens die operasie deursoek.
Lt.kol. Amanda van Wyk, nasionale polisiewoordvoerder, het bevestig dat die klopjag op Jeugdag deur nasionale en provinsiale eenhede, sowel as verskeie ander wetstoepssings- en privaat rolspelers teen vervalste en onwettige goedere uitgevoer is. Beamptes het op groot hoeveelhede nagemaakte handelsmerkprodukte afgekom. Dit sluit klere, skoene, handsakke, horlosies, sonbrille, pette en verskeie handelsmerkverpakkings in.
Hierdie optrede volg op ’n soortgelyke operasie wat sowat ’n week gelede by dieselfde winkelsentrum uitgevoer is, waartydens vervalste goedere ter waarde van meer as R98 miljoen gekonfiskeer is. Saam beloop die vervalste goedere tydens die twee operasies gekonfiskeer meer as R100 miljoen.
Owerhede sê die optredes vorm deel van ’n landwye poging om die handel in vervalste en onwettige goedere te bekamp, wat ’n bedreiging inhou vir verbruikers, wettige ondernemings en die ekonomie.
