John Steenhuisen, die minister van landbou, het aangekondig dat ’n eerste besending van twee miljoen entstofdosisse teen bek-en-klouseer van Turkye af in Suid-Afrika aangekom het. Die minister sê die doel is om genoeg diere landwyd in te ent om internasionale erkenning as ’n bek-en-klouseer-vrye land te verkry, wat weer uitvoergeleenthede vir rooivleis kan verbeter.
Die entstowwe is deel van ’n groter bestelling van ses miljoen dosisse. Verspreiding na provinsies sal binne die volgende paar dae begin. Nog vyf miljoen dosisse is bestel en sal in twee aflewerings aankom, sodra regulatoriese goedkeuring afgehandel is.
Volgens die departement word entstowwe strategies versprei op grond van risiko en die aantal diere in elke provinsie. Sekere landbousektore, soos die suiwel-, voerkraal- en varkbedrywe, sal ook spesiale toewysings ontvang, terwyl ’n deel van die dosisse vir noodgevalle gehou word.
Sedert Februarie vanjaar is miljoene dosisse entstof reeds ontvang en meer as twee miljoen diere ingeënt. Wêreldwyd word steeds uitbrekings van die siekte aangemeld.
