LIMPOPO. – Armieke (5) van Tzaneen is Vrydag omstreeks 18:00 deur ’n skerpioen op haar linkerhandpalm gesteek. Die skerpioen is van die Parabuthus-spesie, met neurotoksiese gif.
Boland Snake Removals 24/7 and Pest Control sê in ‘n sosialemediaplasing Armieke se ouers, Christa en Floris, is van dringende raad voorsien, waarna hulle haar onmiddellik na die naaste hospitaal geneem het. Die nommer vir teengifmiddel by Onderstepoort is ook aan die ouers voorsien.
Weens die erns van die geval is Armieke omstreeks middernag in die intensiewesorgeenheid opgeneem. Sy is die hele Saterdag gemonitor en vir pyn behandel. Die teengifmiddel het met behulp van ‘n koerier by die behandelende dokter uitgekom, waarna dit Saterdag omstreeks 18:00 toegedien is.
Armieke se ouers het ‘n foto aan Boland Snake Removals 24/7 and Pest Control, wat daarna uitsien om die jong meisie eendag te ontmoet, gestuur met Armieke wat sê: “Hulle moet my nou gesond maak.”
