In dokumente wat op 27 Junie verkry was, het die prokureurs van die eksekuteurs van Jackson se boedel gesê die oorlede sanger se sake was in 2009 in so ‘n wanordelike toestand dat hy ten tyde van sy dood op 50-jarige ouderdom meer as R7.5 mjd. se skuld gehad het. Jackson het ook groot uitgawes vir die voorbereiding van sy This Is It-konserttoer aangegaan.
Die hofstukke, wat op 21 Junie by die Los Angeles County-hooggeregshof ingedien is, het verduidelik Jackson se voortydige dood het die boedel met ‘n finansiële las van ongeveer R600 m. vir die toerpromotor gelaat.
Boonop het die prokureurs van die eksekuteurs gesê Jackson het in die jare net voor sy dood van verskeie sakebestuurders, prokureurs en persoonlike bestuurders verander, wat die eksekuteurs gedwing het om dokumente wat oor die hele land versprei was, na die dood van die “Prince of Pop” op te spoor.
In die daaropvolgende jare het die eksekuteurs van die boedel die skuld opgelos en Jackson se beeld en nalatenskap suksesvol verbeter ten bate van die begunstigdes van Jackson se trust, wat sy kinders Prince Jackson, 27, Paris Jackson, 26, en Bigi “Blanket” Jackson, 22, insluit. Volgens Rolling Stone is die Thriller– kunstenaar se musiekkatalogus in 2016 aan Sony vir R11.25 mjd. verkoop.
“Alhoewel meer as ‘n dekade verby is sedert Michael Jackson se dood,” het hul opgemerk, “moet die eksekuteurs van tyd tot tyd die gevolge hanteer van die omstandighede wat ten tyde van Michael Jackson se dood bestaan het.”
Die prokureurs van die eksekuteurs vra nou die hof om die “buitengewone dienste” wat deur ‘n aantal regsfirmas namens Jackson se boedel gelewer is, goed te keur, wat meer as R52.5 m. se betaling beloop.
“Ten tyde van Michael Jackson se dood, was sy bates hoogs belaaid en die skuld was in sommige gevalle in wanbetaling,” het die hofstuk gelees. “Die eksekuteurs, met die hulp van hul regspan, het gewerk om alle skuld op datum te bring, en die skuld onderhandel en herstruktureer teen rentekoerse wat baie gunstiger vir die boedel was, sodat die boedel in staat was om alle skuld wat Michael Jackson gedurende sy lewe so swaar belas het, ten volle te betaal.”
Kommentaar is oor die boedel van Jackson gevra, maar geen terugvoer is nog ontvang nie.
