“Geld wat vir voedingskemas, landbouontwikkeling en voedselverligting bedoel is, gaan dikwels verlore weens korrupsie en swak bestuur.” Privaat speurder Mike Bolhuis van Specialised Security Services (SSS) waarsku dat voedselonsekerheid en wanvoeding nie net ‘n humanitêre krisis is nie, maar ook in Suid-Afrika ‘n groot dryfveer van misdaad is.
Bolhuis sê hoewel Suid-Afrika in die meeste jare genoeg voedsel produseer, het miljoene mense steeds nie toegang tot voldoende kos nie. Volgens navorsing ervaar tussen 11 en 12 miljoen Suid-Afrikaners matige tot ernstige voedselonsekerheid, terwyl bykans een uit elke drie kinders jonger as vyf jaar weens chroniese wanvoeding aan groeivertraging ly. Hy sê honger skep ideale omstandighede vir misdadigers om kwesbare mense te werf en dra onder meer by tot huisbrake, veediefstal, diefstal van landboutoerusting, gewapende rooftogte, dwelmhandel, mensehandel en bendewerwing.
Volgens Bolhuis is korrupsie, werkloosheid, voedselvermorsing, swak infrastruktuur en misdaad teen die landbousektor van die grootste oorsake van voedselonsekerheid.
Bolhuis doen ‘n beroep op Suid-Afrikaners om voedselvermorsing te beperk, plaaslike boere te ondersteun, korrupsie en landboumisdaad aan te meld en gemeenskapsvoedingsprojekte te ondersteun. Hy beklemtoon dat die bekamping van misdaad begin deur gemeenskappe te versterk en te verseker dat mense toegang het tot basiese lewensbehoeftes.
Druk hier om meer te lees.
