VRYSTAAT. – Jonas Mokoena (27) is deur die hooggeregshof in Sasolburg tot 30 jaar direkte gevangenisstraf gevonnis vir die moord op sy vriendin, Mpho Dhlamini (41), en Omphile Innocent Mokoena (1), hul babaseun. Die baba se liggaam is in ’n sportsak bo-op sy ma se liggaam gevind – ’n skokkende ontdekking wat die gemeenskap geruk het.
Sers. Josephine Rani, provinsiale polisiewoordvoerder, sê in ‘n verklaring die liggame van ma en baba is op 16 Januarie 2025 in ’n vlak graf by ’n informele nedersetting in Qalabotjha, Villiers, ontdek nadat inwoners oor ’n onaangename reuk in die omgewing van die hut gekla het. Mokoena het aan die verhuurder voorgehou dat sy vriendin en kind in Balfour is. Kort ná die ontdekking van die liggame het hy spoorloos verdwyn, maar is dieselfde dag deur lede van die Villiers-polisie op pad na Balfour aangekeer.
Mokoena is uiteindelik op twee aanklagte van moord skuldig bevind en op 5 Februarie gevonnis.
