Bewerings dat manlike skispringers hialuronsuur in hul penisse sou inspuit om ’n prestasievoordeel in kompetisies te kry, het internasionaal opslae gemaak kort voor die openingsplegtigheid van die Winterspele in Milaan. Die Wêreldagentskap teen die gebruik van verbode middels (Wada) het kort voor vandeesweek se openingsplegtigheid gereageer op bewerings wat hul oorsprong in die Duitse pers het.
Volgens die Bild sou die groter liesarea na bewering binne ’n aërodinamiese konteks voordelig wees, aangesien 3D-skanderings wat gebruik word om atlete se pakgroottes te bepaal, dan groter as normaal sou uitval en atlete verder sal laat “vlieg”.
“Ek is nie vertroud met die besonderhede van skispring nie, of hoe dit prestasie sou kon verbeter nie,” het Wada se direkteur-generaal, Olivier Niggli, vandeesweek tydens ’n nuuskonferensie gesê. “As enigiets na vore sou kom, sal ons dit ondersoek”.
Skipringpakke word vir elke atleet individueel gemaak en voor elke skipringseisoen noukeurig aangepas.
Bronne: CBS Sports, E!News
