IERLAND. – Forensiese ondersoekers het die oorskot van nog 22 babas by die voormalige St. Mary’s Mother and Baby Home in Tuam, County Galway, gevind. Dit bring die totale aantal babas se oorskot wat sedert verlede jaar deur opgrawings gevind is, op 99 te staan.
Die jongste ontdekking volg op verskeie vorige vondste by die terrein. Ondersoekers het in Februarie vanjaar die oorskot van 33 babas bevestig, waarna die totaal in April tot 69 gestyg het en in Junie tot 77. Met die jongste 22 vondste staan die totaal nou op 99. Die opgrawings word uitgevoer deur die Office of the Director of Authorised Intervention, Tuam (ODAIT), wat probeer om die oorskot te identifiseer en waar moontlik, aan families terug te besorg.
Die jongste oorskot is in klein kiste gevind in ‘n gebied wat volgens historiese kaarte as ‘n begraafplaas aangedui is, maar later met gruis bedek en as ‘n toegangspad gebruik is. St. Mary’s Mother and Baby Home, wat tussen 1925 en 1961 deur die Bon Secours-susters bestuur is, het ongetroude swanger vroue en hul kinders gehuisves. Die terrein het internasionale aandag getrek nadat die plaaslike historikus Catherine Corless in 2014 vasgestel het dat 796 babas en jong kinders by die instelling gesterf het, terwyl daar vir die meeste geen amptelike begrafnisrekords bestaan het nie. ‘n Ondersoek in 2017 het daarna menslike oorskot in ondergrondse kamers op die terrein bevestig, wat tot die huidige forensiese opgrawings gelei het.
DNS-monsters word intussen van familielede versamel in ‘n poging om die kinders se identiteit vas te stel en hulle uiteindelik ‘n waardige begrafnis te gee.
Druk hier om meer te lees.
Bronne: RTÉ News, The Journal (Ireland), Office of the Director of Authorised Intervention, Tuam (ODAIT), BBC News, The Guardian, Sky News, The Irish Independent, The Irish Examiner, The Irish Times, Commission of Investigation into Mother and Baby Homes
