NOORDWES: – Volgens die jongste syfers wat bekend gemaak is, bly geweldsmisdaad steeds ‘n ernstige probleem met 271 moorde wat aangemeld is en ‘n skerp styging van 18,3% toon, terwyl poging tot moord met 17,4% toegeneem het. Gemeenskapsgerapporteerde misdaad het effens met 0,5% toegeneem.
Volgens genl.maj. Ryno Naidoo, provinsiale polisiekommissaris, en Wessels Morweng, die provinsiale LUR vir gemeenskapsveiligheid en vervoerbestuur, het aanranding met die doel om ernstig te beseer ook met 3% gestyg. Die owerhede wys daarop dat faktore soos alkoholmisbruik, huishoudelike geweld en dwelmmisbruik groot drywers van geweldsmisdaad is. Daar is ook kommer oor onwettige mynbou, vigilante optrede en die verspreiding van onwettige vuurwapens. In totaal is bykans 2 000 gevalle van huishoudelike geweld in die kwartaal aangeteken.
Morweng sê daar sal voortgegaan word om polisiëring te versterk en samewerking met die polisie te verbeter, veral in hoëmisdaadgebiede. Daar sal ook gefokus word op die toepassing van wetgewing rondom huishoudelike geweld en beter ondersteuning aan slagoffers. Verder word daar beplan om bewusmakingsveldtogte en voorkomingsprogramme uit te brei, veral gerig op die bekamping van alkohol- en dwelmmisbruik onder jongmense. Samewerking tussen regering, gemeenskappe en ander rolspelers bly volgens Naidoo en Morweng noodsaaklik om misdaad te bekamp.
Ten spyte van die uitdagings is daar ook positiewe tekens: misdade wat deur polisie-optrede opgespoor is, het met 12,3% toegeneem, en padsterftes het danksy gesamentlike wetstoepassingsaksies met 19% afgeneem. Daar is beklemtoon dat gemeenskapsveiligheid ’n gedeelde verantwoordelikheid is en ’n beroep is op inwoners gedoen om aktief betrokke te raak en misdaad aan te meld.
