Genl. Fannie Masemola, die nasionale polisiekommissaris, het nuwe provinsiale kommissarisse in die Oos-Kaap en Vrystaat aangestel. Vanaf 1 April sal lt.genl. Vuyisile Ncata in die Oos-Kaap en lt.genl. Thabang Solly Lesia in die Vrystaat hulle poste as onderskeie provinsiale kommissarisse opneem.
In die Oos-Kaap het Masemola met Oscar Mabuyane, die premier, en Xolile Nqata, die LUR van gemeenskapsveiligheid, ’n vergadering gehou oor die misdaad in die provinsie. Daarna het hy met provinsiale polisiebestuurders vergader om die aanstelling van die nuwe provinsiale kommissaris bekend te stel.
Die posisie was sedert die aftrede van lt.genl. Nomthetheleli Mene in Februarie 2025 vakant. Genl.maj. Thandiswa Kupiso het intussen as waarnemende kommissaris opgetree. Ncata het 31 jaar se dienservaring, onder meer as eenheidsbevelvoerder van die openbare-orde-polisiëring en as stasiebevelvoerder in die Wes-Kaap. Hy het ook as distrikkommissaris van Nelson Mandelabaai gedien. Masemola het gesê hy vertrou dat Ncata die provinsie se ernstige misdaad, insluitend bendegeweld en moorde, daadwerklik sal aanspreek.
In die Vrystaat het Masemola vir Lesia ná die aftrede van lt.genl. Brenda Motswenyane aangestel. Masemola het sy waardering aan genl.maj. Apahia Modise, wat waarnemend in die pos was, uitgespreek. Maqueen Letsoha-Mathae, die premier, het die aanstelling verwelkom en gesê dat die gemeenskap se veiligheidsgevoel in die provinsie verbeter moet word.
Lesia het gesê hy sal as dienaar van die mense optree en verseker dat polisiebeamptes kwaliteit diens lewer. Sy fokus sal wees op die bekamping van dwelms in gemeenskappe, handhawing van professionele polisiëring, die stryd teen geslagsgebaseerde geweld en die bekamping van georganiseerde misdaad.
Brig. Athlenda Mathe, nasionale polisiewoordvoerder, sê die nasionale kommissaris het die polisiebeamptes aangespoor om professioneel op te tree, vertroue by gemeenskappe te bou en die wet streng toe te pas.
