GAUTENG. – ’n Onafhanklike regsfirma gaan die dood van Manqoba Mnisi (5), ’n gr. R-leerling by Laerskool Bernard Isaacs in Coronationville, Johannesburg, ondersoek. Mnisi het Maandag op die skoolterrein seergekry en is dieselfde dag oorlede. Volgens die Teddy Bear Foundation South Africa was hy glo alleen in ‘n klaskamer, het probeer uitkom, was vasgekeer en het gesterf.
Steve Mabona, woordvoerder vir die GDE, sê die ondersoek sal daarop fokus om die feite van die voorval vas te stel en te verseker dat dit deeglik ondersoek word. Die regspan sal Dinsdag deur die LUR, Matome Chiloane, aan die leerling se familie en skool voorgestel word.
LUR Chiloane het sy meegevoel aan die familie, die skool en die gemeenskap uitgespreek en sal vandag (Vrydag), Manqoba Mnisi se familie in Soweto besoek om ondersteuning te bied tydens hierdie moeilike tyd.
