Die gewilde duo ONS het hul nuutste enkelsnit, Vêr Van Die Huis Af, vrygestel, ’n liedjie wat ’n ligter en meer optimistiese klank na vore bring en simbolies met die kleur geel verbind word.
Volgens Fanie Nel, woordvoerder van die Coleske Groep, dui die nuwe vrystelling op ’n terugkeer na die duo se oorspronklike styl en energie wat aanhangers reeds leer ken het. Die groep, bestaande uit Ruvé Erasmus en Marco van Deventer, beskryf geel as ’n kleur van geluk en hoop. Ná hul vorige, meer emosionele snit, wou hulle doelbewus terugkeer na ’n vroliker klank wat herinner aan hul vroeë musiek.
Vêr Van Die Huis Af beeld die gevoel uit van sorgelose aande waar mens net in die oomblik wil bly en nie wil terugkeer na die werklikheid nie. Die kleurtema word ook in die musiekvideo uitgebeeld, met verskeie geel elemente wat gebruik word om die speelse atmosfeer van die liedjie te versterk. Die video is in ’n veld in Pretoria verfilm en sluit visueel aan by die styl van hul debuutalbum.
Met dié enkelsnit keer ONS terug na hul kenmerkende klank en bring weer die energie en vreugde waarvoor hulle bekend is.
Kry Vêr Van Die Huis Af hier op alle digitale stromingsdienste.
