MPUMALANGA. – Nomalanga Labane (43), ‘n voormalige onderwyseres op Amersfoort, het ‘n opgeskorte vonnis gekry nadat sy vir meer as twee dekades met ‘n vervalste matrieksertifikaat onderwys gegee het.
Volgens lt.kol. Magonseni Nkosi het Labane herhaaldelik matriek gedruip, waarna sy gedurende 2003 ‘n vals matrieksertifikaat bekom het. Dit het vir haar die deur na Walter Sisulu Universiteit oopgemaak, waar sy in 2014 ‘n BA in Onderwys verwerf het. Sy is daarna by twee skole op Amersfoort aangestel, eers tydelik en later vas. ‘n Fluitjieblaser het die bedrog in 2022 aan die lig gebring. Die Departement van Onderwys het ‘n interne ondersoek gedoen en het die saak by die Valke aangemeld. Labane het op 26 Maart op alle aanklagte skuldig gepleit en is op 7 Mei tot vyf jaar gevangenisstraf gevonnis, ten volle opgeskort vir vyf jaar.
Die onderwysdepartement het weens haar optrede skade van R1 123 811.42 gely.
