VRYSTAAT. – Nege polisiebeamptes verbonde aan Bultfontein se openbare-orde-polisiëring is vandag (Saterdag) in hegtenis geneem vir die beweerde moord op drie burgerlikes en konst. Mojalefa Borole tydens ’n voorval in 2024. Die nege beamptes, wat die range van konstabel tot sersant beklee, staan tereg op vier aanklagte van moord.
Lizzy Suping, Opod-woordvoeder, sê die inhegtenisnemings spruit uit ’n insident op 22 September 2024 in Phahameng, toe die polisie na ’n huishoudelike rusie ontbied is. Familielede het glo baklei en hulself binne ’n huis verskans toe beamptes probeer ingryp. Daar word beweer dat die polisie die huis met geweld binnegegaan en geskiet het. Drie burgerlikes, almal uit dieselfde familie, sowel as die konstabel wat aan diens was, is op die toneel dood. In totaal is 43 doppies op die toneel opgetel. Die ondersoek het bevind dat al vier oorledenes aan skietwonde gesterf het.
Die polisiebeamptes word in Welkom aangehou en sal Maandag op aanklagte in die Bultfontein-landdroshof verskyn.
