Die Verkiesingskommissie van Suid-Afrika (OVK) het met Google, Meta, Microsoft, TikTok en die nie-winsgewende organisasie Moxii Africa saamgespan om verkiesingsverwante waninligting voor die plaaslike regeringsverkiesing op 4 November te bekamp. Die samewerking is daarop gemik om kiesers toegang tot betroubare inligting te gee en die verspreiding van misleidende inhoud op digitale platforms vinniger aan te spreek.
Sy Mamabolo, hoofverkiesingsbeampte van die OVK, sê die vennootskap gee die kommissie direkte toegang tot die betrokke platforms en maak vinniger optrede teen waninligting moontlik. Die ooreenkoms sluit onder meer samewerking tussen die vennote, bewusmakingsveldtogte en opleiding vir politieke partye, kandidate en ander belanghebbendes in. Die platforms kan ingevolge hul eie beleid inhoud verwyder, waarskuwings plaas of plasings se sigbaarheid beperk. Die OVK beklemtoon dat die ooreenkoms bestaande wetgewing en die Grondwet respekteer en nie die deel van vertroulike gebruikersdata vereis nie.
Die kommissie het ook die Real411-platform aangewys om verdagte waninligting oor die verkiesing te help beoordeel. Enigiemand kan moontlike gevalle by Real411 of deur die Real411-toepassing aanmeld. Klagtes word in al elf amptelike tale hanteer. Ná onafhanklike beoordeling kan aanbevelings aan die OVK en die betrokke digitale platform gemaak word. Die OVK kan ook ’n saak na die verkiesingshof verwys of ’n openbare verklaring uitreik om verkeerde inligting reg te stel.
Kiesers kan die kommissie se riglyne oor hoe om verkiesingswaninligting te herken, te kontroleer en aan te meld op die OVK se webwerf lees. Druk ook hier om meer te lees.
