OOS-KAAP. – ’n Man (62) van Ngojini in Ngqeleni is op aanklag van moord op sy tienerseun (14) in hegtenis geneem. Dit volg op beweerde aanranding wat verband hou met die gebruik van die man se bankkaart.
Luidens ‘n verklaring van polisiewoordvoerder, brig. Nobuntu Gantana, is polisiebeamptes Dinsdagoggend na ‘n woning ontbied. Voorlopige ondersoeke dui daarop dat die voorval Maandagaand omstreeks 22:00 plaasgevind het toe die pa die tiener glo met ’n sambok en ’n stok aangerand het. Die seun is daarna glo met ’n tou vasgebind en oornag in die huis gehou. Die minderjarige is omstreeks 04:00 die oggend dood aangetref. Daar word beweer dat die voorval ontstaan het nadat die seun sy pa se bankkaart gesteel en dit by ’n plaaslike spazawinkel gebruik het.
Die verdagte sal vandag (Woensdag) op ‘n aanklag van moord in die Ngqeleni-landdroshof verskyn.
