Motoriste word aangeraai om nie-noodsaaklike reise uit te stel en uiters versigtig te wees, aangesien swaar sneeu, ys, ysreën, reën en swak sigbaarheid steeds padtoestande in verskeie provinsies gevaarlik maak.
Die padverkeersbestuurskorporasie (RTMC) waarsku dat veral bergpasse en hoofroetes deur die winterweer geraak word. Verskeie paaie is reeds gesluit. In die Oos-Kaap is die N6 by Penhoekpas tussen Komani (Queenstown) en Jamestown, die N9 by Lootsbergpas tussen Graaff-Reinet en Middelburg, die R58 by Barklypas tussen Elliot en Barkly-Oos, asook die Boesmanshoekpas tussen Sterkstroom en Molteno gesluit.
In KwaZulu-Natal en die Vrystaat is die N3 tussen Estcourt en Harrismith gesluit en word motoriste afgeraai om met dié roete na KwaZulu-Natal te reis. Die R74 by Oliviershoekpas, die R74 tussen Greytown en Colenso, asook die R103 en Tugela-tolplaza is gesluit. Die R617 tussen Kokstad en Underberg is eweneens gesluit, terwyl uiters gevaarlike swart ys by Van Reenenpas aangemeld word. In Mpumalanga is die Long Tompas op die R37 heeltemal gesluit nadat verskeie voertuie gestrand geraak het.
In die Wes-Kaap is die Swartbergpas en die Mont Rochelle/Franschhoek-pad weens sneeu gesluit. Die N3-tolroete word ook deur die gure weer geraak. Ligte sneeu is tussen Balgowan en Nottingham Road, asook tussen Van Reenen en Harrismith aangemeld. Reën kom voor tussen Estcourt en die Tugela-tolplaza, langs dele van Van Reenenpas en in die rigting van Harrismith. Mistigheid rondom Van Reenen verminder sigbaarheid en vertraag verkeer. Verkeer wat terugkeer na die langnaweek bou ook in ’n noordelike rigting na Gauteng op, met bykans 1 200 voertuie wat die afgelope uur by Mooi-tolplaza in dié rigting aangeteken is.
Thania Dhoogra, bedryfshoof van die N3-tolroete, doen ’n beroep op motoriste om hul snelheid by die toestande aan te pas, groter volgafstande te handhaaf en hul hoofligte aan te skakel wanneer sigbaarheid swak is. Motoriste moet skielike rem- of baanwisselings vermy, veral op nat paaie of paaie met ys, en voortdurend op hoogte bly van veranderende weer- en padtoestande. “Beplan vooruit, bly ingelig en gee jouself ekstra tyd. Jou veilige aankoms is die prioriteit,” sê Dhoogra.
