LIMPOPO. – Die Pafuri- en Giriyondo-grensposte in die Krugerwildtuin is gesluit nadat aanhoudende swaar reën en ’n vlak 6-weerswaarskuwing vir dele van Limpopo en Mpumalanga uitgereik is. Vanoggend is gewaarsku dat vloedwater oor die Laer Sabie-laagwaterbrug vloei en dat die Krokodilrivier sterk vloei, maar stabiel is.
Luidens ‘n verklaring van SANParke het die grensbestuursowerheid (BMA) die besluit weens weerstoestande en stygende rivierlope regoor die park geneem. Verskeie riviere, waaronder die Delaport-, Nwatshitaka- en Krokodilrivier, vloei tans teen ‘n hoë snelheid, terwyl die Sabierivier ook besig is om te styg, wat reise tussen Satara, Tshokwane, Onder-Sabie en Skukuza kan beïnvloed.
“Padsluitings kan met kort kennisgewing om veiligheidsredes ingestel word,” het JP Louw, SANParks-woordvoerder, gesê. Hy het bygevoeg dat kampeerders in kwesbare gebiede verskuif sal word, maar dat karavane en motorhuise nader aan chalet-areas geplaas sal word en nie na chalets verskuif sal word nie.
Besoekers word aangeraai om parkamptenare se riglyne te volg, en om nie oor oorstroomde paaie of lae brûe te ry nie. Alle waarskuwingstekens moet streng nagekom word. SANParke het bevestig dat die veiligheid van besoekers en personeel die hoogste prioriteit bly terwyl die Suid-Afrikaanse Weerdiens die situasie monitor.
Tot Sondagoggend is die volgende reënvalsyfers aangeteken:
• Tshokwane: 73.5 mm
• Houtboschrand: 85.5 mm
• Olifants: 30 mm
• Letaba: 40.2 mm
• Malelane: 57 mm
• Kingfisherspruit: 51.2 mm
• Phalaborwa: 25 mm
• Mahlangeni: 36 mm
• Mooiplaas: 71.0 mm
• Onder-Sabie: 58.5 mm
• Crocodile Bridge: 45 mm
• Pafuri: 90.0 mm
• Punda Maria: 52 mm
• Shingwedzi: 71 mm
• Vlakteplaas: 51.5 mm
