KWAZULU-NATAL. – ‘n Pasgebore babaseun is vanoggend langs ‘n pad in Pietermaritzburg gevind nadat verbygangers sy gehuil uit die gras gehoor en onmiddellik hulp ontbied het.
Craig Botha van KwaZulu Private Ambulance Service sê paramedici is omstreeks 12:00 na Bombayweg, oorkant Northbury Secondary School, ontbied. Met hul aankoms het hulle die baba ondersoek, hom warm gehou en gestabiliseer voordat hy in ‘n stabiele toestand vir verdere mediese behandeling na ‘n hospitaal geneem is. Botha sê die vinnige optrede van inwoners het waarskynlik verhoed dat die pasgebore baba langer aan die elemente blootgestel is.
Die polisie ondersoek die omstandighede waaronder die baba langs die pad agtergelaat is.
