GAUTENG. – ‘n Persoon het Vrydag gesterf, nadat ‘n woning in die Garsfontein X10-gebied van Pretoria-Oos aan die brand geslaan het. Bure het die brand kort ná 11:30 aangemeld en met aankoms gesê dat die bejaarde vroulike inwoner vermis word.
Volunteer Emergency Medical Response Unit (Vemru), saam met Fidelity SecureFire, het daarin geslaag om die brand te beperk sodat slegs ongeveer 40% van die struktuur skade gely het. Met die hulp van die Stad Tshwane se brandweerdiens kon vrywilligers die brandende struktuur binnegaan. ‘n Onherkenbaar verbrande liggaam is in die hoofslaapkamer aangetref en daar word vermoed dat dit die vermiste vrou is. Nadat die brand geblus is, is die persoon dood verklaar. ‘n Buurman wat probeer help het, het geringe beserings in die brand opgedoen en is op die toneel behandel sonder dat hospitalisasie nodig was.
Vemru het hul innige meegevoel aan die familie van die oorledene betuig. Die toneel is aan die polisie oorhandig.
