LIMPOPO. – ‘n Plaaseienaar (48) en 15 werkers is in hegtenis geneem nadat die polisie tydens ‘n inspeksie op ‘n plaas in Trichardtsdal ‘n beweerde oortreding van die immigrasiewet ontdek het.
Polisiewoordvoerder, brig. Hlulani Mashaba, sê beamptes van die Maake-polisiekantoor het Maandag die plaas besoek waar hulle verskeie werkers aan diens vir identiteits- en immigrasiedokumente gevra het. Twaalf werkers kon nie geldige dokumente voorlê nie en is as ongedokumenteerde buitelanders bevestig. Die 12 werkers is saam met die plaaseienaar in hegtenis geneem op aanklagte wat verband hou met die aanhou en indiensneming van onwettige immigrante. Drie ander buitelandse werkers is ook tydens die operasie aangekeer.
Die groep, wat uit 15 werkers en die plaaseienaar bestaan, sal vandag in die Lenyenye-landdroshof verskyn terwyl die ondersoek voortduur.
