Die polisie het die afgelope week ’n reeks klopjagte regoor die land uitgevoer, waartydens nagemaakte en onwettige goedere ter waarde van meer as R160 miljoen onderskep is.
Lt.kol. Amanda van Wyk, die nasionale polisiewoordvoerder, sê die operasies is saam met verskeie rolspelers uitgevoer en het gefokus op die ontwrigting van sindikate wat betrokke is by die handel in vervalste produkte. In Bellville in die Wes-Kaap is goedere ter waarde van meer as R117 miljoen tydens ’n gesamentlike optrede gekonfiskeer. Duisende items soos handelsmerkklere, sportdrag, tekkies en bykomstighede is daar gevind.
In Gauteng het die polisie op verskeie plekke toegeslaan, insluitend Johannesburg, Tshwane en die Vaaldriehoek. Tydens een van dié operasies is ’n onwettige vervaardigingsaanleg in Johannesburg se middestad gesluit, waar daar op toerusting en produkte ter waarde van meer as R28 miljoen beslag gelê is. Intussen is ’n groot vrag vervalste sigarette ter waarde van meer as R15 miljoen in KwaZulu-Natal onderskep.
Die polisie sê die onwettige handel in nagemaakte goedere hou ernstige risiko’s in, aangesien dit die ekonomie skaad, verbruikers kan benadeel en wettige besighede onder druk plaas.
