LIMPOPO. – Die polisie vra inligting van die publiek ná ’n 16-jarige meisie in ’n plaaslike hospitaal geboorte gegee het. ‘n Verkragtingsaak is geopen soos vereis word in gevalle waar minderjariges betrokke is.
Volgens polisiewoordvoerder, kol. Malesela Ledwaba, is die ma van die 16-jarige op 2 Junie deur ’n maatskaplike werker in kennis gestel dat haar dogter in die hospitaal geboorte geskenk het. Die Namakgale-polisie het die verkragtingsaak oopgemaak. Die voorval het na bewering in September 2025 in die Namakgale-omgewing plaasgevind toe die meisie deur ’n onbekende man genader is terwyl sy op pad huis toe was. Hy het haar glo na ’n nabygeleë bos geneem waar sy verkrag is.
Die identiteit van die verdagte is tans onbekend. Die ondersoek duur voort. Enigiemand met inligting word gevra om sers. Luphundo Mkanzi by 071 355 0556 te bel.
