GAUTENG. – Die polisie se politieke moorde-taakspan (PKTT) soek Fadiel Adams, nadat hy na bewering kontak gehad het met ‘n veroordeelde huurmoordenaar tydens ‘n sensitiewe moordondersoek. ‘n Lasbrief vir sy inhegtenisneming is uitgereik in verband met beweerde bedrog en regsverydeling.
Volgens brig. Athlenda Mathe, polisiewoordvoerder, het Fadiel Adams – leier van die National Coloured Congress – na bewering ingemeng in die ondersoek na die moord op Sindiso Magaqa, die voormalige ANC-jeugligaleier. Adams het glo op ‘n gevorderde stadium van die polisie se ondersoek met die huurmoordenaar kontak gemaak.
Die polisie het reeds verskeie adresse wat aan Adams verbind word, besoek. Reëlings is met sy regsverteenwoordiger getref dat hy hom Maandag by die Kaapstad-Sentraal-polisiekantoor sou aanmeld, maar hy het nie opgedaag nie. Adams moes ook dieselfde dag in ‘n KwaZulu-Natal-hof verskyn, maar het dit eweneens nagelaat.
Die polisie dring by Adams aan om sonder verdere versuim met die gereg saam te werk.
Volgens IOL het Adams by ‘n mediakonferensie ernstige beskuldigings teen die polisie geuiter toe hy beweer het dat lede van die politieke moorde-taakmag ‘n voormalige woning van hom in Westridge, Mitchells Plain, deursoek het sonder ‘n geldige deursoekingsbevel. Hy beweer dat ‘n vrou met gewere gedreig is, ‘n 12-jarige seun aangerand is en die hele gesin getraumatiseer is, terwyl die eiendom reeds weke vantevore aan ‘n nuwe eienaar verkoop is. Adams het lt.genl. Nhlanhla Mkhwanazi, die KwaZulu-Natal-polisiekommissaris, direk geblameer vir die voorval en hom as die “swakste polisiekommissaris in 30 jaar” beskryf.
