GAUTENG. – Sewe gewere, ‘n pistool, reflektiewe baadjies en ‘n gekaapte BMW X5 is Woensdagaand in Daveyton aan die Oos-Rand gevind. Die Gautengse polisie en die Ekurhuleni-metropolisie het op ‘n vermeende skuilplek van ‘n geld-in-transito roofbende toegeslaan het. Die verdagtes het egter gevlug en ‘n grootskaalse soektog is geloods.
Brig. Athlenda Mathe, nasionale polisiewoordvoerder, sê die operasie is op grond van inligting uitgevoer. Die bende is opgespoor wat vermoedelik met verskeie ernstige en gewelddadige misdade regoor Gauteng verbind kan word. Tydens die deursoeking van die huis is die gewere, die pistool, die reflektiewe baadjies en ‘n BMW X5 wat as gekaap aangemeld is, gevind.
Die ondersoek duur voort en die polisie verwag om inhegtenisnemings te maak namate die soektog na die verdagtes, wat aan hulle bekend is, verskerp.
