GAUTENG. – Konst. Rudzani Ernest Marumo (43) en konst. Thabang Gerald Makgotla (32) is elk gevonnis tot 14 jaar direkte tronkstraf vir moord en ‘n verdere drie jaar vir aanranding met die opset om ernstige liggaamlike leed te veroorsaak. Die beamptes het Thando Gazu (40) in ‘n sel in die Honeydew-polisiekantoor aangerand en gemartel.
Sedert Maart is 26 polisiebeamptes vir moord skuldig bevind, terwyl meer as 179 moordsake nog op die hofrol is.
Gazu het gedurende Oktober 2019 in aanhouding gesterf, terwyl sy vriend Msizi Memela ook deur die twee aangerand is. Opod het die beamptes in 2019 in hegtenis geneem, waarna die saak na die Suid-Gauteng Hooggeregshof verwys is. Die hof het albei beamptes op 18 Mei ook onbevoeg verklaar om ‘n vuurwapen te besit.
Die vonnisse sal gelyktydig uitgedien word.
