KWAZULU-NATAL. – ‘n Veroordeelde reeksverkragter is Vrydag tot vyf keer lewenslank en nog 155 jaar tronkstraf deur die Mtunzini-hooggereghshof gevonnis, nadat hy aan verskeie ernstige misdade skuldig bevind is.
Volgens polisiewoordvoerder, kol. Robert Netshiunda, het die reeksverkragter die gemeenskappe in Richardsbaai, KwaMbonambi en Empangeni vir ’n geruime tyd in vrees gedompel. Hy is skuldig bevind op sewe aanklagte van verkragting, twee van poging tot moord, drie van roof, asook huisbraak en aanranding. Sy misdade het reeds in Maart 2017 begin toe hy ’n vrou in KwaMbonambi verkrag en gewurg het. In ander voorvalle het hy glo op ’n vrou geskiet, ’n ander verkrag en slagoffers gedwing om die aanranding te aanskou.
Speurders van die eenheid vir gesinsgeweld, kinderbeskerming en seksuele misdrywe (GKS) het die sake aan mekaar verbind nadat dit duidelik geword het dat ’n reeksverkragter in die gebied aktief is. Hy is in 2021 in hegtenis geneem en op 21 aanklagte aangekla. Een van sy slagoffers was ’n 13-jarige meisie wat aangeval is nadat hy by ’n woning ingebreek het.
Sy naam sal ook in die nasionale register vir seksuele oortreders aangebring word.
