Die Suid-Afrikaanse regering gaan die volle koste dek om die land se vee teen bek-en-klouseer, wat tot ‘n nasionale ramp verklaar is, in te ent. Boere sal nie vir die entstowwe hoef te betaal nie.
John Steenhuisen, die minister van landbou, sê entstof is reeds na al die provinsies versprei en die inentingsprogram is goed op dreef. Honderdduisende diere word weekliks ingeënt terwyl die land mik om teen Desember sowat 80% van die nasionale kudde te bereik. Een miljoen entstofdosisse is van Biogénesis Bagó in Argentinië ontvang, asook 1,5 miljoen dosisse van Dollvet in Turkye. Verdere besendings word in die komende weke verwag om die veldtog te ondersteun.
Steenhuisen het sy waardering uitgespreek teenoor staats- en privaat veeartse en bedryfsvennote wat help met die inentingsprogram. Hy het veral organisasies soos die Melkprodusente-organisasie bedank vir hul samewerking om Suid-Afrika se veebedryf te beskerm. Hy het terselfdertyd belanghebbendes gewaarsku om versigtig te wees vir verkeerde inligting oor die siekte wat op sosiale media versprei word. Volgens hom is dit belangrik dat boere en ander rolspelers inligting verifieer voordat dit gedeel word, aangesien verkeerde inligting tydens ’n biosekuriteitskrisis groot skade aan die landbousektor kan veroorsaak.
Steenhuisen het ook gesê daar is wanvoorstellings oor die koste van die entstowwe. Gerugte fokus glo op ’n bedrag van sowat R45 per dosis, maar dit weerspieël slegs die verskaffer se grootmaat-afleweringsprys en sluit nie logistieke koste soos internasionale vervoer, koueketting-berging, kwaliteitskontroles en verspreiding na provinsiale depots en veeartsenyspanne regoor die land in nie.
Lees meer hier onder:
