In ‘n verklaring deur die Suid-Afrikaanse Wapeneienaarsvereniging (SAGA) word dit beklemtoon dat die toename in vuurwapenlisensie-aansoeke ‘n teken van wetsgehoorsaamheid is en nie van toenemende risiko nie.
Volgens ‘n sosialemediaplasing van SAGA meen Gun Free South Africa (GFSA) die toenemende aantal vuurwapenlisensie-aansoeke en die verlies van vuurwapens deur burgerlike eienaars is ‘n groot bron van kommer en dra by tot die probleem van onwettige vuurwapens. SAGA stem egter nie saam nie en voer aan dat die polisie se eie syfers ‘n ander prentjie skets. Volgens SAGA dui die statistiek daarop dat vuurwapens wat verlore raak of gesteel word uit staatsbeheer ‘n groter probleem is.
SAGA sê meer as 3 400 polisie-vuurwapens is oor ‘n tydperk van vyf jaar as verlore of gesteel aangemeld, terwyl slegs ‘n klein gedeelte daarvan teruggevind is. Die organisasie meen die kern van die probleem lê by swak beheermaatreëls, voorraadbestuur en aanspreeklikheid binne staatsinstellings. Parlementêre inligting het ook getoon dat honderde vuurwapens wat later teruggevind is, oorspronklik aan die polisie en private veiligheidsmaatskappye behoort het. SAGA voer aan dat hierdie syfers daarop dui dat vuurwapens uit amptelike voorraadkamers en staatsbeheer ‘n belangrike bron van onwettige vuurwapens is.
Die debat tussen GFSA en SAGA fokus dus op die vraag waar die grootste bron van vuurwapens in die hande van misdadigers ontstaan – by burgerlike vuurwapeneienaars of binne staatsinstellings en amptelike voorraadstelsels.
Volgens SAGA is daar ‘n duidelike verskil tussen wettige en onwettige vuurwapenbesit. Iemand wat ‘n lisensie aanvra, onderwerp homself aan opleiding, agtergrondkeuring, veilige bewaringsvereistes en deurlopende polisietoesig. Indien ‘n wettige wapen gesteel word, is die eienaar volgens SAGA die slagoffer van ‘n misdaad, nie die bron van kriminele bedoeling nie.
Die organisasie bevraagteken die vergelyking dat meer as 7 000 burgerlike vuurwapens teenoor net oor die 500 polisiewapens as verlore of gesteel aangemeld is. SAGA wys daarop dat hierdie syfers nie vergelykbaar is nie: die polisiesyfer (572) verwys uitsluitlik na polisie-eiendom, terwyl die ander syfer (7 895) ‘n breër kategorie is wat handelaars, veiligheidsmaatskappye en instellings insluit, nie net gewone lisensiehouers nie. Die meerderheid van daardie wapens is bowendien as gesteel aangemeld, nie as vrywillig beskikbaar gestel nie.
