KWAZULU-NATAL. – Yolanda Nombuso Mgobo, ‘n sakevrou van KZN, se voertuie en eiendomme is gevries nadat die Spesiale Ondersoekeenheid (SOE) bevind het dat sy meer as R18 miljoen onregmatig bekom het. Dit word aan bedrieglike UIF TERS-eise tydens die Covid-19-pandemie gekoppel.
Die SOE se woordvoerder het bevestig dat die Spesiale Tribunaal bevel gegee het dat Mgobo, as die enigste direkteur van Yoluleko Trading, haar lewensmaat Hlalanathi Hopewell Mbangi en die maatskappy verbied word om enige van die gelyste bates te verkoop, oor te dra of te verberg terwyl die ondersoek aan die gang is. Mgobo het volgens die ondersoek betalings van R18,632,335 in haar persoonlike en sakerekeninge ontvang — geld wat sy en Mbangi na bewering tussen 2020 en 2025 vir persoonlike gewin gebruik het.
Die bevrore bates sluit drie voertuie in – ‘n Hyundai Tucson, ‘n Ford Ranger en ‘n Toyota Corolla, asook vier eiendomme in Scottburgh en Uvongo langs die KwaZulu-Natalse Suidkus, met ‘n gesamentlike waarde van ongeveer R3.7 miljoen. Alhoewel Mgobo self nie UIF TERS-eise ingedien het nie, het sy glo geld ontvang van verskeie entiteite wat dit welgedoen het, waaronder Nakomang Trading Enterprise wat sowat R19.2 miljoen van die UIF ontvang het, asook Ezogu Trading (R8.73 miljoen) en Ezikamshalaza Trading (R5.09 miljoen).
Die gebruik van ‘n spookwerknemer-databasis om toegang tot noodlenigingsfondse te verkry is ‘n kriminele oortreding. Die SOE sal die saak na die Nasionale Vervolgingsgesag verwys vir oorweging van vervolging op aanklagte van bedrog en geldwassery.
Druk hier om meer agtergrond te lees: Gekoördineerde deursoek-operasies is op verskeie persele in KwaZulu-Natal en Gauteng uitgevoer as deel van ‘n ondersoek na ‘n gesofistikeerde sindikaat wat na bewering sowat R161 miljoen uit die UIF se Covid-19 TERS-noodlenigingsfonds gesteel het.
Kaizer Kganyago, woordvoerder van die SOE, het bevestig dat die operasie bewyse aan die lig gebring het van ‘n goed georganiseerde sindikaat wat vals TERS-aansoeke ingedien het namens mense wat nooit werknemers van die betrokke maatskappye was nie. Die geld is dan onder sindikaatlede verdeel, wat op geldwassery neerkom. Die saak sluit 16 maatskappye en meer as 35 individue in. Sleutelfigure sluit in Nhlakanipho Mngomezulu, direkteur van Lubelo Hlomuka Holdings, wat deur die SOE as die beweerde brein agter die sindikaat uitgesonder word, en Thamsanqa Madlala, direkteur van Bokoharama Construction en raadslid by die Ray Nkonyeni Munisipaliteit, wie se maatskappy sowat R18 miljoen ontvang het. Mgobo, wie se bates vroeër hierdie week deur die Spesiale Tribunaal gevries is, word ook as ‘n sleutelfiguur in die sindikaat geïdentifiseer.
Persele wat deursoek word, strek van Scottburgh en Port Shepstone aan die KZN-Suidkus tot Pietermaritzburg, Durban, Sandton en Johannesburg. Die SOE deursoek ook die UIF-hoofkantoor in Pretoria om te bepaal of amptenare bedrieglike aansoeke vergemaklik of oudits omseil het. Digitale toestelle, bankstate, TERS-aansoeke en verwante dokumentasie word in beslag geneem vir forensiese ontleding. Die SOE sal daarna siviele stappe instel om staatsverliese te verhaal. Bewyse van kriminele gedrag sal na die Nasionale Vervolgingsgesag verwys word.
