Johnny Davids (49), die veelsydige Walvisbaai-gebore sanger en mediapersoonlikheid, is in Pretoria oorlede ná ’n hartaanval. Hy het naam gemaak as ’n bekroonde TV-aanbieder, sportkommentator, radio-omroeper en sanger met ’n sterk aanhang in Namibië en Suid-Afrika.
Volgens NBC Digital News het Davids vroeër Woensdag borspyn ervaar, maar dit glo geïgnoreer. Hy was in ‘n gastehuis in Pretoria waar hy gewerk het aan ’n episode van die kykNET-program Landbouweekliks. ’n Ambulans is Donderdag omstreeks 03:00 ontbied, maar paramedici kon nie sy lewe op die toneel red nie.
Sy lewensverhaal is vervat in sy outobiografie Boytjie, waarin hy vertel van sy kinderjare sonder sy biologiese ouers, sy aanneming en sy pad na sukses, insluitend sy oorwinning in die sangkompetisie Zing op kykNET. Huldeblyke stroom steeds in, met die hoof van die TV-kanaal VIA, Azelia Morkel, wat hom beskryf het as ’n besonderse mens met ’n inspirerende storie van hoop en oorwinning. Ook Radio Tygerberg het hulde gebring en hom geloof vir sy nederigheid en sy rol as ’n “stem van die mense”.
Davids laat sy vrou, Liezel, en drie kinders agter.
Bronne: NBC Digital News; Namib Times; Radio Tygerberg; Ysters Facebook-blad
