GAUTENG. – Die polisie het oor die naweek bewys dat niemand bo die wet verhewe is nie, nie eens lede van die polisiediens self nie. Twee senior polisiebeamptes en ‘n burgerlike personeellid het hulself bevind in die visier van die owerhede waarvoor hulle werk toe hulle in hegtenis geneem is oor beskuldigings dat hulle by smokkelhandel in edelmetale betrokke is. Die offisiere is as gen.maj. Ebrahim Kadwa, die Gautengse hoof van die Valke, en genl.maj. Feroz Khan, ‘n misdaadintelligensie-offisier, geïdentifiseer.
Brig. Athlenda Mathe, nasionale polisiewoordvoerder, sê Gauteng Teenintelligensie-operasies het ná ‘n deeglike ondersoek toegeslaan en het die drie verdagtes oor die naweek in hegtenis geneem. Die inhegtenisnemings is met die uitreiking van ‘n J50-lasbrief uitgevoer. Die ondersoek het gefokus op beweerde onwettige edelmetaaltransaksies, korrupsie en ‘n reeks verwante misdrywe. Die polisie bevestig dat die saak deel is van ‘n groter, volgehoue poging om georganiseerde misdaad-netwerke van binne af te ontmantel wat die land se edelmetale smokkel en amptenare omkoop.
Die drie sal na verwagting vandag op aanklagte van onwettige handel in edelmetale, korrupsie en regsverydeling in die Kempton Park-landdroshof verskyn.
