LIMPOPO. – ‘n Sersant (52), verbonde aan Soshanguve-polisie in Gauteng, het na bewering Saterdag twee familielede doodgeskiet en nog twee gewond. Tydens ‘n poging tot inhegtenisname het hy na bewering sy eie lewe geneem.
Kol. Malesela Ledwaba, polisiewoordvoerder, sê die voorval het in Tayereni in Dennilton-polisiëringsgebied plaasgevind. Beweerde huishoudelike konflik het glo in die vroeë oggendure by ’n huis tussen die sersant en sy vrou ontstaan. Volgens Ledwaba was daar reeds spanning in die verhouding en is die vrou glo na haar ouerhuis in Tayereni om skuiling te soek.
Die verdagte het toe omstreeks 01:00 by die woning opgedaag en skote geskiet. Twee familielede, die 68-jarige skoonma en ’n 29-jarige stiefseun, is noodlottig getref. Die vrou en die egpaar se 14-jarige dogter is ook gewond, maar het daarin geslaag om uit die huis te vlug en is na ’n plaaslike hospitaal vir behandeling geneem.
Die polisie het onmiddellik ’n soektog na die verdagte begin, waarna hy later by sy woning in Dennilton opgespoor is. Toe beamptes probeer om hom in hegtenis te neem, het hy hom na bewering self geskiet en is hy op die toneel oorlede.
Ledwaba sê dit is nog nie bevestig of die vuurwapen wat gebruik is ’n dienswapen of ’n privaat wapen was nie, aangesien die oorledene glo in besit van albei was. Twee vuurwapens en ammunisie is vir verdere forensiese ondersoek gekonfiskeer. Die onafhanklike polisie-ondersoekdirektoraat (Opod) het die ondersoek oorgeneem, terwyl die polisie die voorval as ’n tragiese en sinnelose daad van geweld beskryf het wat ’n gesin verwoes het.
