NOORDWES. – ‘n Man (25) het na bewering Saterdagoggend sy ma (48) in Mahikeng met ‘n graaf doodgeslaan. Volgens die polisie word ‘n video-opname van die grusame voorval op sosiale media versprei.
Lt.kol. Sam Tselanyane, polisiewoordvoerder, sê die aanval het omstreeks 11:00 plaasgevind. Die seun, wat volgens berigte aggressief en onbeheerbaar opgetree het, is kort daarna self dood nadat hy deur ’n buurman geskiet is wat probeer het om die aanval te stop.
Die motief vir die moord is tans onbekend. Die polisie se eenheid vir okkulte misdade is by die ondersoek betrek.
Genl.maj. Patrick Asaneng, die waarnemende provinsiale polisiekommissaris in die provinsie, het gesê: “Die sadistiese, grusame en sinnelose dood van ’n ma deur die hande van haar seun is ‘n teken van satanistiese rituele praktyke of dwelmafhanklikheid waaraan baie jongmense blootgestel word en wat ongelukkig dikwels deur ouers en ’n onverskillige, apatiese samelewing geïgnoreer word. Dit kan nie gesê word dat daar geen waarskuwingstekens in die lewe van die verdagte was nie, gegewe die onnodig demoniese moord op sy eie ma. Alhoewel hy self gesterf het nadat hy geskiet is, sal die polisiediens se eenheid vir okkultverwante misdaad hierdie saak volledig ondersoek om die oorsaak en gevolg van hierdie gruwelike tragedie te bepaal.”
