OEKRAïNE. – Die eienaar van die Oekraïense sokkerklub Shakhtar Donetsk het meer as $200 000 geskenk aan die skeleton-renjaer Vladyslav Heraskevych nadat hy voor sy deelname aan die Milano Cortina-winterspele gediskwalifiseer is.
The Guardian berig die 27-jarige Heraskevych is verlede week geskors nadat ’n jurie van die International Bobsleigh and Skeleton Federation bevind het dat die beelde op sy helm – wat die gesigte van 24 atlete uitbeeld wat in die oorlog met Rusland omgekom het – die Spele se reëls oortree.
Hy het daarna ’n appèl in die sportappèlhof verloor, slegs ure voor die laaste twee bene van sy kompetisie. Hy het toe reeds die eerste twee weens sy diskwalifikasie misgeloop.
Heraskevych is vir etlike dae toegelaat om met die helm in Cortina d’Ampezzo te oefen. Die Internasionale Olimpiese Komitee het hom egter ’n dag voor die aanvang van sy item in kennis gestel dat hy nie die helm tydens die kompetisie mag dra nie.
“Vlad Heraskevych is die geleentheid ontneem om vir oorwinning by die Olimpiese Spele mee te ding, tog keer hy as ’n ware wenner terug na Oekraïne,” het Rinat Akhmetov, president van Shakhtar, in ’n verklaring gesê.
Volgens Akhmetov is die respek en trots wat Heraskevych onder Oekraïners verdien het deur sy optrede die hoogste beloning. Hy het bygevoeg dat hy wil hê die atleet moet oor genoeg energie en hulpbronne beskik om sy sportloopbaan voort te sit en om aan te hou veg vir waarheid, vryheid en die nagedagtenis aan dié wat hul lewens vir Oekraïne gegee het.
Die geskenkbedrag is gelykstaande aan die prysgeld wat Oekraïne aan atlete betaal wat ’n goue medalje by die Olimpiese Spele verower.
Bronne: The Guardian, The Independent
Men’s World Cup race at the 2018/19 Skeleton World Cup in Altenberg
